Aakalimo oyendji yokoshitopolwa shaKunene, oya taalela oshikukuta oshidhigu konima sho inaya mona omvula okuza sho ya temuna nuumvo niimuna yawo oya sapo kondjala.
Okwa kundanekwa aakwashigwana komidhingoloko dhilwe unene dhuunamapya koshitopolwa shoka, ya kanitha oshindji unene kiimuna yawo mbyoka ya sipo kuulumbu, yamwe kwa lopotwa ya tembuka omalukalwa gawo ya kale modoolopa ya Opuwo, yo ya tegelele ekwatho lyiikulya okuza kepangelo.
Aakalimo yoko Kunene, yamwe oyati iikulya mbyoka haya pewa inayi gwana, oshoka pokati mpoka ohaya kala nondjala omanga ya tegelela omakwatho gathike.
Oshiwike shaziko, okwa lopotwa aakalimo yokomidhingoloko dho shitopolwa shoka, ya tokola oku hinga iimuna yawo yuuka koshitopolwa Omusati ya ka konge uuhupilo wiimuna yawo.
Ngoloneya goshitopolwa Omusati Inginus Endjala, okwa lombwele Eagle FM, kutya oshitopolwa shawo nasho inashimona omvula ya gwana nuumvo unene kiitopolwa yuuninginino hoka oko taku thikilwa kaaKunene.
“Oshitopolwa shetu otashi vulika sha mona oopelesenda 25 dhomvula yo nuumvo, shoka shili oshidhigu kiimuna nokaanamapya nuumvo tashivulu wo shikale oshidhigu kuyo,” Endjala tati.
Ngoloneya goshitopolwa Oshana Elia Irimari okwati omuloka gonuumvo kagushi omwaanawa, nolwindji aaniimuna moshitopolwa uunene komidhingoloko dhokomikunda, ohaya litha iimuna yawo koombinga dhoodholopa hoka oko kwa mona omata geli gwepo.
Irimari okwati ombelewa ye oyili monkundadhana naakuthi mbinga moshikondo shuunamapya oku tulapo omalongekitho gokwiilongekidhila oshikukuta.
“Aaniimuna mboka twa kundana taya zi koshitopolwa shaKunene, ota shivulika twiiyadhe ya thika wo moshitopolwa shaShana, oshoka Omusati inagu lokwa nawa, okakele otwiipyakidhila noonkambadhala ndhoka tadhi vulu oku yamukula konkalo ndjika,” Irimari ta tsikile.
Comments