Okwa lopotwa puna omahangano ngoka ooyene yago aatiligane, taya kutha miilonga aanilonga aaludhe noku kalekamo aatiligane ooyakwawo.
Eagle FM etiyali oyayi moonkundathana na Labor Executive Director Bro Mathew Shinguandja shinasha noolopota ndhika, nokwati uuministeli wo labour owuna oolopota dhaagandji yiilonga aatiligane taya kutha aanilonga miilonga taya tala komalwaala goshipa.
Okwati shika osheyapo konima yoka video kaningi ethimbo taka taambathanwa komalungula uunene tuu ko WhatsApp okuza momwedhi May nuumvo, moka mwamonika aatiligane taya kundathana nkene yena oku kutha miilonga aanilonga aaludhe, noyeli yiilongekidha okushininga yo ya hupithe oompito dhiilonga yaatiligane mehangano.
Shinguandja okwati otaya ningi omakonaakono moka video hoka, molwaashoka inaya tseya kutya ooyene yehangano lini mboka taya kundatha moka video, okwa pula moshigwana ngele opuna ngoka ena uuyelele woka video haka akwatathane nombelewa ye nenge noshikondo sho labor opo ehangano ndika liningilwe omakonaakono moshinima.
“Oshinima shika otashi talikako onga uukwamuhoko uuna ehangano lyontumba hali tala koshipa shomuniilonga nokuya yoolola kutya nguka omuluudhe nenge omutiligane na itashi popilwa pakotampango lyokatendo kiilonga,” Bro Mathew tati.
Okwati iiningwanima iyali (2) oya lopotelwa nale uuminiisteli.
Bro Mathew okwa popi kombinga yoshikumungu shilwe shehangano lyiitungitho lyo Build It ndyoka talyaadhika mOshakati moshitopolwa shOshana, tati aawiliki nenge eelelo lyehangano ndyoka oyati itaya ningi omayindilo gomakwatho yambidhidho gopashimaliwa ngaashi ngoka geetwapo ko Social Security Commission. Molwaashoka anuwa iimaliwa mbyoka oyaaluudhe.
Okwati pethimbo oshilongo shiiyadha mo lockdown okuza momasiku 28 March sigo 05 May nuuvo omolwa oomilandu omipe dhekateko lye taandelo lyo Coronavirus, omahangano ngoka giiyadha geli muupyakadhi wopashimaliwa nenge gakanitha iiyemo, ogapewa ompito opo ooyene yomahangano yaninge omayindilo kiindo mbyoka yapitikwa oku gandja omakwatho yambidhidho pethimbo ndyoka, ndele inaga nuninwa aantu yomuhoko nenge yolwaala lontumba.
Bro Mathew okwati otaya ningi omakonaakono mehangano lyo Build It, nongele ehangano ndyoka otali lundilwa koolopota ndhoka tali gandje uuyelele moshinima shika.
Tagwedhapo kutya omahangano ngoka taga longitha omikalo dhuukwamuhoko odhili pondje yooveta dhuuministeli, nokwati uuministeli owanongela woo kutya moshilongo omuna omahangano ngoka haga tindi okuulika oondjambi dhaanilonga uunene aatiligane molwaashoka ohaya futwa oondjambi dhivulithe dhaanilonga aaluudhe noshapumbwa oku mona ehulilo.
Okwa tsikile tati pethimbo lyo Lockdown uuministeli owapula aagandji yiilonga kutya inaya kutha aanilonga miilonga, nokonima yo lockdown ngele ehangano olya hala oku kutha aanilonga miilonga otali vulu okushininga moku landula omilandu dhooveta dhaanilonga.