Omupopiliko godoolopa Petrina Shitalangaho okwa lombwele Eagle FM omaandaha kutya elelo lyodolopa yOndangwa, olyati opoloyeka yetungo lyomatala omape olya tamekithwa omuvo gwaziko, noshimaliwa shoo milliona N$15 osha pungulwa mopoloyeka ndjoka.
Omatala omape otaga tungwa miitopolwa iyali moka kehe oshitopolwa shomatala, otagapu koshimaliwa shoo milliona N$7.5.
Shitalangaho okwati doolopa oyina omatala gopatatu, omatala ngoka tagaadhika komudhingoloko go ABC, omatala gopOndjondjo oshowo omatala omape ngoka opo gatungwapo mOndangwa.
Omatala omape ogeetwapo oku kandulapo omukundu gokwaahena omahala goku landithila, unene kaalandithi yomo ma pandaanda mboka yakala taya landithile moondjila dhomo doolopa.
“Omatala omape ogena omahala geli omilongo 54 no tamwaadhika uutala woku landithila iihape niingumutulu wuli 28, wiikulya niikunwa 6, uutala wonyama ombihu 9, woku yothela onyama ano Okapana 9, ombelewa yimwe yiilonga dhalwa yoku nyanyangidha oshowo ombelewa yamuni yomayakulo goongeshefa oonshona nodhopokati, ndjoka tayi kala noku gandja omayakulo kaalandithi yomomatala ngoka,” Shitalangaho tati.
Elelo lyodolopa Ondangwa, okuza momwedhi March nuuvo, olyeetapo omalunduluko lyoku longolola omatala omakulu noku goopaleka, omolwa omilandu omipe ndhoka dhatulwapo kepangelo mekondjitho lyo COVID-19 ndjoka ya palamena uuyuni.
Mayola godolola Paavo Amwele okwa lombwele Eagle FM kutya elelo lyodoloopa, olina edhilaadhilo lyoku longolola omatala woo omashona ngoka tagaadhika komudhingoloko gOmwandi, nelalakano oku gandja woo omutalelo omwaanawa modoolopa noku gandja omahala aandjuka nogayela kaalandithi.
Omalunduluko ngoka geetwapo ngaashi ngeyi momatala godoolopa yOndangwa, ngaashi ngoka tagaadhika pomudhingoloko gOndjondjo oga gwedhelwa nogatopolwa momahala ngoka aalandithi naayakulwa momatala yakalathane kokule oshinano pokati komuntu, mekeelelo lyetaandelo lyo coronavirus.