Oshilyo shongudu yo Namibia Economic Freedom Fighters (NEFF) omusamane Abraham Ndumbu okwayi moonkundathana no Eagle FM ayamukula peha lyongundu koshipopiwa shomu president Hage Geingob pethimbo iithana iikundaneki osoondaha yaziko moshilando pangelo.
Oshingi osha landula kuumbangi wa gandjwa mompangu shinasha noshikumungu sho Fishrot, moka mwa popiwa kutya ongundu yo Swapo yamono iimaliwa okuza ko Fishrot.
Ndumbu okwati ongundu yawo oyina uudhigu noka komisi koku konaakona iimbuluma yuulingilingi moshilongo, molwashoka itaka uukilile aantu pawu handimwe mboka taya fofodholwa yenamo olunyala moshikumungu sho Fishrot.
Okwati wo kutya tango oka komisi nakeethepo manga ongundu yoSwapo, nokonima ngele kamana oku konakono noku mangapo aantu ayehe mboka ya kwatelwa mo Fishrot, uunene mboka omadhina gawo gaholoka miikundaneki ya futwa iimaliwa yuulingilingi moshikumungu.
Okwati uuna oohandimwe ya mangwapo, naya hokolole nkene ya futwa iimaliwa mbyoka, ngee oyali wo iilyo yehangano lyo Fishcor. Tagwedhapo kutya epangelo nali hulithepo oku hepeka iimaliwa okweeta mompangu mboka yeli nale konima yomakumba.
“Ethimbo oshipotha shika osha kwata olule, notashi manapo oshimaliwa sho shigwana, na otashi gandja wo ompito kwaambo taya nikwanikwa opo ya holeke omaliko gawo, oshowo omaumbangi ngoka ga pumbiwa moshipotha shika,” Ndumbu tati.
Tatsikile kutya kehe gumwe ta kamonika ondjo moshipotha shika nakuthwe kehe shok ena, shikale oshiholelwa ku kehe ngoka ena edhiladhilo lyoku yaka omaliko goshigwana nenge epangelo keshi elekele.
Okwa holola okuuva nawa kongundu yo NEFF kutya aatseyi veta yamwe mboka ya tumbulwa moshipotha sho Fishrot, oyeli ya manguluka, omanga yakwawo mba ya longa nayo uulingilingi yeli mondjedhidhililo.
Okwati ongundu yawo oyina omalalakano goku kondjitha oshipotha shoka shikale sha manithwa muule wethimbo ehupi, nonande tati kashili oshipu molwaashoka ongundu yoSwapo oyo yina aantu oyendji momutumba wopashigwana, noolwindji kayihole iinima ya nika uulingilingi tayi popiwa momutumba gopashiwana.
Okwa pula yo aayamnidhidhi yoNEFF noshowo aaNamibia ayehe yeya wayimine molugodhi loku lwitha iimbuluma nuulingilingi moshilongo.