Opolisi yo moshilongo oya gandja elondodho koshigwana, uunene kaa kalimo yo komudhingoloko gOtwaloloka mOmbaye moshitopolwa Erongo, tashi vulika aakengeleledhi ya pitile moshiponga shomulilo shoka sha holoka kOmbaye osoondaha.
Omupopiliko gopolisi, Deputy Commissioner Kauna Shikwambi, okwa popi no Eagle FM etitatu tati konima yoshiponga shomulilo, aasamaria aanamutimahenda, oshowo mboka yuuvite olukeno nuukwawo wanankali pamwe naamboka ya kanitha omaliko gawo ngoka ya longa nuudhigu, oya kala taya pula opo ku gandjwe oma yambidhidho oku pitila moohandimwe oshowo yamwe ya longitha omikalo dhoombaanga.
“Omolwa onkalo ndjika ya holokapo, ndika oya talikako woo ompito yoku longitha iimbuluma, nopolisi ya Namibia otayi londodha oshigwana shikale shili uupathi, oshoka aakengeleledhi ohaya pitile momikalo nga ndhika oku yuga oshigwana iinima yawo ngaashi omaliko giimaliwa nenge omaliko gomalukalwa medhina lyaamboka ya dhengwa kuupyakadhi womulilo kOtwaloloka,” Shikwambi tati.
Okwindile aakwashigwana ya kwashili paleke kutya kehe oshinima nenge oshimaliwa ya hala oku kwathela, nayeshi gandje okupitila maantu yeyashi nawa, nenge koonzo ndhoka dhishiwike nawa.
Shikwambi tati aantu mboka yena ehalo oku yambidhidha otaya vulu oku wo kwata thana noshikondo shiiponga mombelewa yomu Prima minister kongodhi 0811247338.
Okwa dhenge omuthindo petaandelo lyo Covid-19, tati ngaashi ngeyi omukithi ngoka ogwiihanena oshilongo, aantu naya ihumbate nawa, noku landula milandu.
“Oshigwana inashi kala ashike sha tegelela opolisi yikale tayi ya dhimbulukitha kombinga yomukithi nguka uunene oku kalekapo omilandu dhekelelo lyo Coronavirus moshilongo, ngaashi oku zala oka mask mokati kaantu, oku kala kokule nomangungo nayilwe,” Shikwambi tati.
Tagwedhapo kutya aantu naya iyageke okuya momalweendo inaaga teegelelwa, omapashiyono gaahena oshilonga, ngele omuntu otavulu oku longela kegumbo, otashikala wo oshaanawa oku keelela etaandelo lyo Covid-19, okwiiyoga komake olwindji noku longitha sanitizer.